يـا نــاس يـــا مــــكــبــوتـــه 0000هـــى دي الــحـــدوتـــــه!!


$$$$$$$$$$$$$$$$$$$$$$$$



الأربعاء، فبراير 25، 2009

انفجار الحسين

عرفت من عصفورتي


الجميله


ان انفجار التحرير الفائت على يد


امرأتين منقبتين كان قبيل مناقشه قانون


الطوارئ بأيام0000وعندما تم تأجيل المناقشه


تم التغاضي الاعلامى عن الحادث


وهنا في هذه الايام حدثت الحادثه من سبعه


أيام تقريبا


وهذا أيضا هو نفس الاسبوع الفارق بين


الميعاد المنتظر لمناقشه قانون


الطوارئ في مجلس الشعب


والحدق يفهم!!!!!


وبما انني احسب نفسي"حدق"


قولت يكونش لا سمح الله


المقصد هو انه لا يسمح بمنع


قانون الطوارئ لأن مصرنا الحبيبه


تخضع لحاله طوارئ دائما


لأننا مستهدفون من كذا جهة


اعلم انها محليه الصنع ولا تحوي سوي


الكثير من المسامير


فهي في الاغلب لا تقوي علي الاماته


ولكن هدفها الترويع الدامي والاصابه


ولكن هل يمكن لفرد ان يضر باقتصاد بلد


ناهيك عن اصابه البشر اصابات بالغه


احيانا تؤدي للموت


بغية ان يبقي علي كرسي المسئول


أوقائد العسس


او شخص اّخر ذا نفوذ جبار


وسيخدم هذا القانون مصالحه؟؟؟؟




يارب تكون الحكاية صدفه


ويارب اكون مسئ الظن





الخميس، فبراير 19، 2009

ساعتها الدنيا هتحلو

حضرات الساده والسيدات والاّنسات الأفاضل والفضليات



بعد مساء الفل;



حابب اتكلم عن طريقه بسيطه اوي لكن مش سهله 000الطريقه دي- قبل ماتكلم-


انا شايفها وسيلة تضمن لنا غاية



اننا نبقى اقوي واعدل شعوب الارض



الطريقه بمنتهي البساطة كانت تطبق أيام ما كان الاسلام من اعظم


الامبراطوريات سيادةّّ ومكانه ومساحه



بس انا مش هتكلم من المنطلق الديني00انا هتكلم من المنطلق الاجتماعى:



زي اي قريه قديمه زمان 00زي التعاون اللي بنشوفه في


لعبه " ايدج اوف ايمباير"



مثلا ;تعاون تحس انه فيه طاعه لا يمكن نوصلها

الا بالحب والتفاهم



طيب احنا امتي نقدر نحقق التفاهم؟؟ ده الزمن اللي احنا فيه ده زمن بيبقي


رجل ومراته في بيت واحد ومش قادرين



يوصلوا للتفاهم 000ازاي يوصل شعب كامل ل ليفل التفاهم؟؟



الاجابه:


الزمن عمره ما كان السبب000العيب فينا00

والتفاهم نوصله بالحب



لما نبقي زي الناس بتاعه زمان :: بنحب بعض بجد بنخاف علي بعض:: لما نبطل نعاكس


ونتحرش بالبنات لما نفكر انها
اخت او زوجه


او
بنت شخص تاني يهمني امره00بحب له الخير 0

ازاي هعاكسها؟!!



لما نبطل نغش بعض 00لما نبطل نكره لبعض الخير


لما بجد نحب بعض



لما نتعامل مع بعض بنيه صافيه000لما يهمنا امر بعض00لما كلمة "انا"


تبقي" احنا" وطالعه من جوايه بجد



ساعتها هنبقي اوتوماتيك اقوي واعدل شعوب الارض



العدل محتاج قوه تحميه000واحنا قوتنا في مباديئنا واخلاقنا

لو ضيع
ناها ضيعنا



انما الامم الاخلاق مابقيت



ان هم ذهبت اخلاقهم ذهبوا




القصه مش قصة فساد نظام او سرقه او ضرايب او حديد



لانها لو الحكايه في دول 000يبقي خير وبركه
هييجي يوم وهيتغيروا 00هل حد يقدر

يجزم اننا ساعتها هنتحسن؟



مش هنتحسن لانك لو سألت اي شاب دلوقتي وقولتله:
لو هتشتغل مع يهود في شغلانه

وهتاخد فلوس كتير000 تشتغل؟



فيه اللي علي طول هيقول اشتغل000وفيه اللي يقول مادام مفيش في
الشغل حاجه حرام اشتغل0000


واختفت النسبه اللي
كنت مستنيها تقول



لا طبعا عمري ماشتغل!! مع اني كنت فاكرهم كتير
طلعوا مفيش!!!



ولما بتيجي تستغرب يقولك:ياعم مانا لو ماشتغلتش هييجي غيري يشتغل
وهيبقي بيتقال له وسط الناس يا بيه ويا باشا بفلوسه!!!



طب يا بوب ماهي من زمان معروفه انك لو ماسرقتش فيه غيرك هيسرق
لو مازنيتش فيه غيرك هايزنى



بس المشكله ان دلوقتي السرقه تفتيح مخ000والكدب ادمان
والخبث كيف, والزنا شطاره, والسرقه فهلوه



وكلامي ده ليك وليا ولينا كلنا مش بس للنظام والحكومه0
كمان للشباب اللي سألتهم

عن الشغل في اسرائيل



والشباب دول بقي اخواتنا وولادنا وازواجنا
شباب من العامه من العاديين


يعني لاهما مع النظام ولا معاهم تمن الحديد



مشكلتنا يا جماعه اخلاقيه عامة000مالهاش دعوه بحكومات
ليها دعوه بالسلوك



ده حتي اللي بيقولوا عليه مفتح دلوقتي وفاهم شويه 0000وعرف
بالظبط خبايا وتفاصيل


عمليه سرقه لصالح الناس
الوحشين



بدل مايطالب بحقه ولا حتي يوعي الناس ولا يقول لهم "لا" بيروح
يجيب حقه من ناس تانيين مالهمش فيه


ضحايا زيهم زيه
0000 ويزود مثلا اجره الميكروباص




واحد حس ان الاجره غليت عليه000يروح يرتشي ويمد ايده للحرام



ونتيجه لكل ده اتولد عندنا غيره وحقد وعند علي بعض
جاب كره ونكد000ولسه هايجيب



تعالوا ندور ع الحب000تعالوا نغير في الجدر ونسيبنا من الورق
نبص ع الاصول ونسيبنا من الفروع



اصل الناس الوحشين دول ايه؟؟ مش هم اصل المشكله
الاصل هو ان الناس دول طالعين نتاج

بيئه كلها فرديه
ومصلحه ذاتيه



بيفكروا بمبدأ::ازاي اتهني انا ويولع الناس0000 هما من بقيت اهلى؟!!!
وبيدور بيهم الزمن

وبييجوا بعد كده علي اهلهم
والدايره بتوسع



عشان المشكله اخلاقيه




يا ست ياللي مش عاجبك غلاء الاسعار000ياعم ياللي بالك مشغول
بسبب دخول المدارس

000يا كابتن ياللي بتسافر
وتغرق في البحر هربا



من هنا0000يا حاج ياللي حاسس ان عمرك ضاع هدر



تعالوا قبل ما ندعي علي الناس الوحشين ونشتكي منهم
تعالوا نبص لنفسنا 000تعالوا نتغير



تعالوا نحب جيرانا0000ارجعوا للجدعنه والمروءه000تعالوا نخاف
علي بعض000نبص للاشياء


والمصالح بعين
جماعيه مش فرديه



قبل مانعمل اي حاجه هتفيدنا00000نفكر الاول
هي هتضر مين



تعالوا احنا نتغير 000ساعتها بس هنقدر نغير 0000ساعتها نقدر
نقلع توب العجز



ساعتها الدنيا هتحلو


السبت، فبراير 14، 2009

عيد الحب 2009




احبك وانطلق عصفور


واسبح في الهوا والنور


واملا الكون بأغانيا


ولو كان الجناح مكسور


احبك تستكين الريح في قلبي

والاماني تصيح بحبي


واعشق التصريح ودربي

في الفضا مغمور



احبك تبتدي البدايات

تاخدني ضحكتك بالذات

تعيدني روح وقلب و ذات

تزيدني كشف للمستور


احبك ضي روحى يبان



واعبر ضلمه الحرمان

واهجر غابة الأحزان


واحقق حلمنا المسحور


احبك وانطلق عصفور

واسبح في الهوا والنور

واملا الكون بأغانيا

ولو كان الجناح مكسور

الجمعة، فبراير 13، 2009

الرجالة ماتوا في الحرب

قالها الكينج منير في أغنيه ساح يا بداح

طول عمرهم العسكر عسكر000 بس الناس زمان كات ناس

جملة واحده خلصت الكلام

يعني هما من زمان وهما كده

بس الفرق ان زمان كان فيه رجاله

بجد مليت من اني كل ماتكلم مع حد في الشارع الاقيه مخنوق وبيدعي ع الحكومه

لما كلنا مخنوقين 000طب احنا مستنيين ايه

ليه بس بنعيب ع الحرامي ومش بنعيب علي سلبياتنا اللي سامحه علي طول الخط بأن الحرامي يسرقنا

يا جدو يللي مارضيتش تتكلم وقلت اعيش في سلام انا وولادي 00انا مش عايز اروح ورا الشمس

ويابويا ياللي عشت زي ما جدي عاش

انا ابنكم اهو بقول اني اتخنقت 000وياعيش بكرامه يا بلاش منها عيشه

ولو عشت في سلام انا ومراتي وولادي

هييجي بردو اللي من صلبي بيشتكي من سلبيتي

ماحنا مش هنستورد ناس ولاد كلب من بره فاضيين ومالهومش فيه ومعندهمش ست وولاد يخافوا عليهم

عشان يقولوا بدالنا لا

لا للظلم ولا للغطرسه ولا للاستكانه ولا للخوف

احنا اتعودنا الخوف 0000 خدنا ع الذل

وعلي رأي منير برضه::

"انا لازم اغير00 لو مش قادر00 انا لازم اغير واتغير "

الثلاثاء، فبراير 10، 2009

وحشتينى

كانوا مختلفين ومتخانقين 0000وماشيين من بعض زعلانين
هو رجع البيت مهموم غلبته همومه ونام::::
شاف انه بيتصل بحبيبته ويقولها عايز اشوفك ,وحشانى 000وافقت حبيبته واتفقوا ع المكان والزمان
ولما راح للمكان 00لقى نفسه وصل قبلها قال يستناها000حس بحاجه غريبه 00لون السما بقى ازرق قاتم 00غامق اوى
صوت من بعيد بيقرب شويه شويه 00مخيف اوى
ومره واحده لقى هجوم عليه من كلاب ليها وجوه ذئاب , و جان اشكالهم مرعبه , ومسوخ مطموسة العيون 000كلهم موجهين عيونهم ليه وحطينه هدفهم
فكر يجرى بس خاف على محبوبته اللى زمانها جاية 000قرر يفضل واقف يستناها وقلبه بيتعصر من الخوف
فجأه وصلت 00جري عليها وقالها يلا بيننا نجري 00يلا نهرب من هنا
استغرب لما لقاها مش خايفه وبتبصله نظره بارده

هى: انت جاى عشان كده؟!!
هو: كده ايه؟؟!! يلا بس بيننا نجرى الوحوش جايه علينا
هى: يا سلام!!! يعنى مش عارف ان انا اللى اقدر اصرفهم
هو: انتى بتقولي ايه!!؟ يلا بينا نهرب
هى: انت مش جايلى تشوفنى 00انت جايلى عشان انا الوحيده اللي اقدر اصرفهم وانقذك00هتفضل انانى كده, انا ماشية وهسيبك ليهم

هجمت الوحوش عليه000بعدما مشيت حبيبته ظالماه
صحى من النوم مبهور بس مش موجوع ولا مزعور 000 صحى من النوم حاسس انها واحشاه 00مع انه لسه شايفها ظالماه
قام ع التلاجه يشرب ومسك الموبايل يبعتلها مسج::

"ليه دايما بتظلمينى مع انك بتحبيني0000وحشتينى"

السبت، فبراير 07، 2009

ليه يا بـحـر

ليه يا بحر لونك ازرق000ليه؟
ليه مش احمر ؟00يمكن عشان لو كنت احمر كنت بقيت مخيف
طب ما انت ساعات بتبقى مخيف00 بس ساعات كمان حنون 00وساعات غضبان وساعات فرحان وساعات مريح
تصدق انت غامض يا بحر!! يمكن ده السبب؟؟ يمكن انت ازرق عشان غامض؟يمكن عشان مجروح
ليه يابحر بتبقي ساكن وهادي في عز زحمه الصيف 000في عز اللعب والتنطيط والفرح والبنات والشباب
وليه بتبقي عاصف وفاير في الشتا والناس نايمين ومن البرد مستخبيين
ليه مختلف عننا مع اننا بنحبك يا بحر
؟
طب ازاى احنا بنحبك مع اننا عارفين ومتأكدين ان كتير ماتوا جواك غرقانين متعذبين او مضحيين
ليه بنلعب جواك وبيك ومعاك وبنبقى فرحانين في عز ماحنا منك حذرين وساعات خايفين
ليه يابحر بتبقي ساكن وهادي في عز زحمه الصيف 000في عز اللعب والتنطيط والفرح والبنات والشباب
وليه بتبقي عاصف وفاير في الشتا والناس نايمين ومن البرد مستخبيين
يمكن بنحبك عشان مختلف 00عشان عليك مش متعودين؟
؟
يمكن ده السبب؟؟ ماحنا بردو طول ماحنا بعاد بنحب بعض ذوق مع بعض ولطاف وجدعان وحنيين
طول ماحنا لسه في الاول مشتاقين ومش علي بعض متعودين
ليه لما بناخد علي بعض وبنتطبع بطباع بعض وبنفهم ونعرف اكتر بعض بنبقي من بعض ملانين وذهقانين وساعات كتير علي بعض متعودين واحيانا ناسيين وعودنا لبعض وانانيين وساعات للاسف بنبقي خاينين
يا بختك يا بحر بحبنا مع اننا عن بعض مختلفين